買基金投資組合制唔制得過?

高登有個Post
　「最近有個十年冇見既舊同事搵返我，原來轉左行sell基金
　話每月供幾千蚊，
　回報率最高可達80%以上 ，
　點都好過放銀行咁話。」by網友 靚女唔追巴士

我做過某大保險公司既Agent，雖然唔係做得耐，但都大約清楚基金為名既保險或其他保險，亦都清楚銷售流程。利申一下，本人都有一隻基金相連保險，只係我個投資相連保險係唔需要供既。行內亦有好多野都唔方便講太多。

但點都要提提上面位高登絲打，一個唔留神，佢就可能簽左Ｄ番唔到轉頭既野。我唔係話保險Agent有問題或者邊隻邊隻保險產品唔好，加上聽聞最難sell既客好似就係Auditor。但只係想大家做決定前多留意一下個agent。

當有Agent sell你，其實佢有冇自爆果隻保險產品既所有全部壞處呢？我受過保險公司training，大約知道銷售流程，聯絡感情好基本，再以大量產品好處介紹，而壞處呢？唔好計你主動問果Ｄ，大家可以自行數數手指，數下佢主動同你講左邊幾樣問題。

產品壞處冇人清楚得過佢地，因為做得呢行，答唔到客既問題就好易bye bye。作為全職Agent，一日見幾個客，日日講類似既野，大大小小幾百條問題，包括你問到佢唔識答既問題，佢地自然都早有準備。對Agent最正既係，而家Ｄ產品故意整到鬼咁複雜，比到好大空間Agent「發揮」。就連我呢個大學生只係想比較三間保險公司四類product既收費都要花好多心機。

但最容易計既當然係Agent既commission（佣金）。羊毛出自羊身上，但問佢地邊個product佢地收最少佣金，如果你覺得有可能問到就試下問，但結果應該都係果幾個model answer。或者佢地攞兩個計劃比你，會話你知邊一個收少Ｄ。（咪住）上面果段我話有四類products，咁另外果兩類呢？

一句講哂，分辨基金不如分辨Agent，但係做得一個成功既Agent，佢講幾多野比大家聽，而Agent又知幾多野，大家應該心中有數。