斜櫈做生意

西九龍中心Canteen驚現斜櫈，筆者雲哥我見到真係O哂咀，聽聞食客投訴到不得了。好好地一張長櫈整到咁斜實有原因，可能好似公園唔比露宿者黎訓，政府就將長櫈加幾個扶手變三座位。不過堂堂一間大商場，冇埋由遇到呢類露宿者問題，筆者我幾個月前都去過果層SSP食野，Ｄ野都算平靚正，但好地地枱枱櫈櫈都咁乾淨都要拆，難道呢位菲律賓第二富豪既西九龍中心老闆，受到某Ｄ壓力要制裁下我地呢班香港人，體會一下菲律賓既生活環境，食野唔可以食得咁舒服？

佢作為商家，我諗都係利益為大前提，但究竟呢張斜櫈點樣為佢帶黎更高盈利，呢樣真係諗爆頭。唯一諗到既，只係唔想客人食咁耐以及唔好用個袋霸住個位，如果呢個策略係work，真係要好好參考一下，估唔到深水埗呢個地方既生意多到做唔哂，要諗埋呢類橋去增加客人。但係咁樣繼續落去，真係熟客都變生客。到時做壞左個場真係喊都無謂，不過最受害既，應該都係Ｄ小商戶。西九既目標顧客已經係做低檔生意，毛利率唔係好高，除左間賣兩餸既多人食之外都應該係辛苦經營，最後間間食店執哂，老闆就可以裝修過成層，租比高檔食店收多Ｄ租。希望佢地既策略唔係諗住斷人衣食，只係物業公司職員買錯櫈喇。